Монгол омогшил” үндэсний шилдэг илтгэгч шалгаруулах уралдаант ТВ реалити шоу нэвтрүүлэг

“Нийгмийн Ардчилал Монголын Залуучуудын Холбоо”, “Шинэ залуус хөгжил” хүрээлэн, UBS телевиз, “G” entertainment продакшнтай хамтран зохион байгуулж буй “Монгол омогшил” үндэсний шилдэг илтгэгч шалгаруулах уралдаант ТВ реалити шоу нэвтрүүлэг 2010 оны 11-р сарын 17-ны өдөр оюутан залуус, үзэгч түмнийхээ дунд олныг байлдан дагуулж, оролцогчдын сэтгэлийг омогшуулсан өргөн сүр дуулиантайгаар нээгдлээ.

Залуусын үзэл бодлыг тэр бүр олон нийтийн мэдээллийн хэрэгслээр ард түмэнд хүргэх боломж дутмаг байдаг учир уг тэмцээн нь нийгэмд тулгамдаад байгаа асуудлыг шийдэх гарцыг хайж буй монгол залуусын санаа бодлыг олон нийтэд илэрхийлэх боломжийг олгоод байна. Зүгээр нэг реалити шоу хийгээд зогсохгүй, цаашид төрийн эрх баригчидтай хамтран тулгамдсан асуудлуудыг газар дээр нь шийдэж чаддаг болох бүтээлч үйл ажиллагаа болгохын тулд тэмцээнийг зохион байгуулагчид нийт оюутан залуусынхаа төлөө өдөр шөнөгүй ажиллаж байна.
“Монгол омогшил” хэмээх нэрний хувьд нэг талаасаа энэ бол түүх соёл, уламжлалаараа бахархах сэтгэлийг залууст төрүүлэх, нөгөө талаас ирээдүйдээ залуус юу хийж бүтээхийг хүсч, ямар монгол орныг мөрөөдөж байна гэдгийг уг тэмцээнээр дамжуулан нийгэмд төрийн шийдвэр гаргах түвшний хэмжээний хүмүүст хүргэх гэсэн утга, зорилготой юм.
Хот, хөдөө орон нутгаас нийт 500 гаруй оюутан залуус уг тэмцээнд бүртгүүлсний дээр хамгийн ахмад оролцогч 57 настай бол, хамгийн залуу нь 17 настай байв. Тэмцээн 1 сарын хугацаанд үргэлжлэн үзэгчдэд хүрэхийн сацуу 6 шатласан дараалал бүхий даалгавруудыг хийж гүйцэтгэнэ. Эхний шатанд бүртгүүлсэн нийт оролцогчид “Монгол омогшил” сэдвээр 3 минутын хугацаанд илтгэл тавьж, өөрийн бахархал, монгол хүн болж төрсний омогшлоо илэрхийлж, уйлж, инээж, хашгирч, хоолой нь чичирч, нүдэнд нь нулимс цийлэгнэн байсныг энд дурдах нь зүйтэй. Эцсийн 6-р шатны шалгаруулалт 12-р сарын 14-ний өдөр ДБЭТеатрт болох бөгөөд шилдэг 30 илтгэгчээс шилдгийн шилдэг, илтгэх урлагийн үндэсний аварга шалгарч, 3 сая төгрөгний шагнал хүртэх болно.
Шүүгчдээр Илтгэх-Эрдэм хүрээлэнгийн тэргүүн, илтгэх урлагийн загалмайлсан эцэг Б.Гэрэл, СУИС-ийн хэл ярианы тэнхимийн эрхлэгч, тайзны ярианы багш, СТАжилтан, Магистр М.Одонтуяа, СУИС-ийн тайзны ярианы багш, МУГЖүжигчин А.Чаминчулуун, МУИС-ийн МХСС-ын захирал, шинжлэх ухааны доктор Заяабаатар нар ажиллаж байна.

Нэврүүлгийн анхны дугаар 2010 оны 11дүгээр сарын 20-ны өдрөөс эхлэн UBS телевизийн дэлгэцээр цацагдах ба үзэгч олныг байлдан дагуулж, нийгмийг эрүүлжүүлэх хөдөлгөөнийг эхлүүлнэ гэдэгт зохион байгуулагчдын зүгээс итгэлтэй байна.